– Dette er kalven min, fortalde 10-åringen Birgit Hovi frå Rogne til «Valdres».
– Han heiter Rødflo. Han er snill.
Det var mange snille kalvar på folkemuseet denne dagen. Også ein snill hest som baud på vognskyss.
Sauene var litt stressa. Dei var jaga hit og dit av gjetarhunden Misty. Det var fordi sauebonde Oddgeir Hilmen-Fodnes skulle vise kor presist Misty samarbeidde med han. Dei hadde stort publikum, men det brydde Misty seg ikkje om.
Truleg har det aldri vore så mange på landbruksdagen som i år. Arrangementet vart avvikla for sjuande gong.
– Vi selde 1060 billettar. Ungane under tre år gjekk inn gratis. 160 var med i arrangørstaben, og neste like mange deltok med utstillingar, dyr eller med andre aktørroller, seier koordinator Magnhild Strand.
For ungane var dagen eit heilt leikeland. Dei klappa kaninar, steikte lomper, hoppa i høyet og spikka med skarpe tolleknivar.
Svein Thorsrud frå Sør-Aurdal fekk Valdres landbrukspris. Amfiscena baud også på mange underhaldningsinnslag. Valdres bygdeungdomslag hadde presisjonskonkurranse med motorsag, koret Kurve song vakkert og elevane til Stian Roland i Øystre Slidre sjarmerte med lausdans.
Mange, lokale produsentar presenterte matvarer utan kunstige tilsettingsstoff. Men det var slidrekua Rosa frå Haugo samdrift som fekk mest ut av dagen. Ho stakk av med den beste premien i fesjået.
Sjå bildeserie.