– Det er utruleg kjekt å vera i gang att, og vi gler oss enormt til sjette kapittel av festivaleventyret neste sumar, slår festivalsjef Eirik Høyme Rogn fast.

Arbeidet med å finne artistar til Vinjerock 2012 har pågått sidan tidleg i haust, og festivalsjefen kan love fleire artistslepp i tida som kjem. Totalt skal 25 plassar i programmet fyllast opp fram mot sumaren.

 – Allereie i midten av desember skal vi lansere fleire namn, blant anna eitt av dei som hamnar øverst på plakaten neste år, fortel han.

Vinje som bluegrass

Blant namna i det fyrste artistsleppet finst også to lokale innslag. Bandet Ugle, med vangsgjeldingen Jogeir Daae Mæland i front, tek turen til Eidsbugarden i juli. Det gjer også Staut, som gjer ein eksklusiv Valdres-konsert for sumaren 2012 

På lista står òg Ila Auto, som også spelte på festivalen i 2010. Neste år kjem dei derimot attende med eit litt annleis konsept: Gamle tekstar etter Aasmund Olavsson Vinje skal kleast opp i bluegrass-drakt og framførast for fjellrockarane.

 – Det gler eg meg vanvittig til, og det blir ekstra kjekt å endeleg kunne heidre Vinje også gjennom musikken, seier ein godt nøgd Høyme Rogn.

Hardrock og mjukrock

Oslobandet Montée, med Anders Tjore og Maya Vik i front, kom med albumet «Rendition of You» tidlegare i vår, og fekk store terningar kasta etter seg. Det same gjorde dei superenergiske indie-punkarane i Rumble in Rhodos frå Follo, som kom med albumet «Signs of Fervent Devotion» på forsommaren. Båe har vore i toppen av listene når dei beste norske skivene i 2011 skal oppsummerast.

 I tillegg kjem også Jonas Alaska til Jotunheimen. 23-åringen frå Åmli i Aust-Agder har gjort storeslem det siste halvåret, etter å ha sjarmert festivalpublikummet på Øyafestivalen i sumar i senk. I haust kom det sjølvtitulerte debutalbumet, og singlane «October» og «In the backseat» har snurra jamnt på dei største radiokanalane i haust.