Det er ein tredel av storleiken i Eid kraftverk, og kan bli utbygd i 2008.
Tanken i Kvennfossen er å byggje ein om lag to meter høg dam i ei lengde på rundt 100 meter over Begna ved Kvennfossen. Ved å installere turbinen i sjølve dammen, kan ein få til eit fall på vel fem meter. Prinsippet blir det same som for Eid kraftverk. Dammen vil føre til ein ny, liten innsjø som vil strekkje seg frå Kvennfossen og opp til Rusetbakke bru.

Fallag
Eid kraftverk produserer 53 gigawattimar (GWh) straum i året. Leiar av Kvennfossen fallag, Christoffer Rustebakke, fortel at Kvennfossen vil bli bygd for rundt 20 GWh, og at investeringa vil bli på rundt 60 millionar kroner. Dette er nok straum til om lag 1000 husstandar. Om kraftprisen er på 30 øre, vil Kvennfoss-straumen representere ein årleg verdi på seks millionar kroner.
15 grunneigarar har stifta Kvennfossen fallag. Dei har engasjert selskapet HydroPool Gruppen i Lier som ekstern ekspert. Tanken er at fallaget skal leige ut fallretten til eit aksjeselskap, som skal byggje kraftverket. Det vil både HydroPool Gruppen, grunneigarane og lokale investorar skyte inn pengar.

Har søkt konsesjon
Det er også HydroPool Gruppen som har utarbeidd konsesjonssøknaden, som vart sendt NVE i førre månad. Rustebakke reknar med eitt års behandlingstid på søknaden, og seier dersom det blir ja, så vil dei setja fullt fokus på utbygginga. Den kan med andre ord kanskje starte i 2008, eller i 2009.
— Har de bestemt dykk for utbygging om de får ja, Rustebakke?
— Ja, det har vi gjort, om det blir positivt svar. Vi meiner det er viktig å utnytte ressursane og eigedomane våre. Tanken er å skaffe bygda og eigedomane våre inntekter.
Christoffer Rustebakke seier tre utbyggingsalternativ er vurderte, og at det dei landa på er det mellomste i storleik og det mest miljøvennlege.i
Innvendingane vil eventuelt gå på leveforholda for elveperlemuslingen og gyteplassar for fisk. Det er laga ein miljørapport som følgjer konsesjonssøknaden. Det er mellom anna ein føresetnad at det blir bygd fisketrapp i sjølve dammen. Men Christoffer Rustebakke meiner dammen og den nye innsjøen ovanfor, nettopp kan føre til særs gode forhold for elvemuslingen.