Valdreskommunane har gått saman om å etablere NAV-kontor i Valdres.
– Som utgangspunkt ynskjer dei eit samarbeid over kommunegrensane for å skapa eit godt tilbod til innbyggarane i Valdres. I november starta eit etableringsprosjekt saman med NAV Oppland, seier Torill Trøen, som er prosjektleiar.
Ei forprosjektgruppe har arbeida med ein regionmodell for NAV etablering, og det er denne modellen ein jobbar vidare med. Prosjektet har ei styringsgruppe beståande av alle rådmenn i Valdres, NAV-direktøren i Oppland og tillitsvalgte. Måndag blir det arrangert ein konferanse for alle politikarar, administrasjonen i kommunane og alle tilsette i NAV.
– Denne bør politikarane få med seg, for det er dei som skal avgjera kva for organisasjonsmodell NAV i Valdres skal ha, framhevar Trøen.
Til konferansen kjem blant andre stortingspolitikar og leiar av arbeids- og sosialkomiteen, Karin Andersen, og Jarleif Haugen som er leiar for pilotprosjektet for etablering av NAV i Nord-Gudbrandsdalen.