Vindin vassverk har jobba på spreng sidan det vart brot på hovudleidningen ved Furustrand onsdag ettermiddag, og no er det bora hol og lagt nye røyr under riksveg 51.

– Vi har halde på i eitt, og mellom anna henta folk frå Lillestrøm til å sveise dei nye pvc-røyra. No er det bare tilkoplingsarbeid att, og nett no ventar vi på delar som kjem frå Kongsberg med bil. Eg vonar at abonnentane våre vil ha vatn i ettermiddag.

Ringstad fortel at det er vanskeleg å arbeide med røyra, fordi fjorden kjem innpå, det er mykje vatn og vondt å sjå skikkeleg. Dei har bora ned til ein meter under vass-speilet i Heggefjorden.

– Men så snart vi er ferdige med tilkoplingsarbeidet, vil vatnet bli sett på att, lovar Ringstad

– Blir det dyrt?

– Eg trur nok vi kjem opp i meir enn 100.000 kroner, men forsikringa dekkjer ein god del. Vi har ganske stor eigenandel, men utover det vil forsikringsselskapet dekke utgiftene, seier Harald Ringstad.

Alle abonnentar sør for Furustrand har vore utan vatn i snart to døgn, det vil seie bustadfelta i Tingvang og Moane og heile Volbu. Øystre Slidre kommune har kjørt ut vatn til gamle og sjuke.