Sjølvaste 17. mai blir det opningskonsert i Ål kyrkje med Ragnhild og Eldbjørg Hemsing og gruppa Kvarts. Konserten er eit tingingsverk som Kvarts har skrive for folkemusikkveka på Ål i mai og Jørn Hilme-stemnet på Fagernes seinare på sommaren.
Elles er Den Norske Folkemusikkveka stolt av at den kjende perkusjonisten Terje Isungset har skrive tingingsverket «Gamle og nye hallingdrakter» i samarbeid med Sigurd Tunestveit. Verket blir framført i Ål kyrkje saman med Lena Willemark og Ålkoret.
Knut Reiersrud og Iver Kleive held konsert i Gol kyrkje

Munnspel i verdsklasse
Av andre spesielle attraksjonar, er munnspelaren Brendan Power.
– Du trur det ikkje før du får sjå og høyre, heiter det frå arrangørane på Ål, som lovar eit forrykande møte med det som kanskje er den beste munnspelaren i verda.
Brendan Power bur i Storbritannia, men er opphavleg frå New Zealand. Han trakterer både bluesmunnspel og kromatisk munnspel og har skapt seg ein heilt særeigen og original spelemåte. Han har spela med ei lang rekkje verdskjende musikarar som til dømes Van Morrison, Paul Young, Shirley Bassey, Sting, og mange fleire. Særleg er han kjend for å spela irsk tradisjonsmusikk, men er også svært god til å spela både blues og jazz.

Festkonsert
Laurdag den 23. mai blir det festkonsert med Stian Carstensen, Lena Willemark, Brendan Power og Alan Prosser.
Og det blir dans, gode spelemenn, kurs og andre aktivitetar veka igjennom.
Jens A. Myros minnepris på 5.000 kroner blir delt ut. Han skal gå til stimulering av tradisjonelt dans eller spel blant talent under 20 år.
Når det gjeld Fanitullprisen, er det tre prisvinnarar som skal spela finale på festkonserten laurdag. Då står det om ein flott sølvpokal og 15.000 kroner for vinnaren av ein pott på totalt 30.000 kroner til fordeling mellom finalistane.