Valdresgildet 2009 går av stabelen pinseaftan, laurdag 30. mai, og blir denne gong arrangert i området rundt Fagerlund Hotell – og i samarbeid med hotellet.
– Vi har bestilt godt vr, seier Anne Berit Leithe Husager og Geir Harald Fodnes, på vegner er av arrangørkomiteen.
Valdres Matforum er arrangør saman med Fagerlund Hotell, og med god støtte frå Valdres natur- og kulturpark.
Sentralt i matgildet står som før konkurransen om å produsere den beste kurven.
- Vi oppfordrar gjerne produsentar som ikkje har vore med før til å delta, seier Geir Harald Fodnes. Men konkurransen blir halden innanfor dalføret.
– Kurv er ein del av det rike, varierte mattilbodet i Valdres, seier Fodnes. Valdreskurven blir laga på ein heilt spesiell måte og er derfor ein valdresspesialitet.

Kjendiskokk og superbudeie
Arrangørane ønskjer i år å skapa ekstra stor aktivitet og folketilstrøyming ved å setja opp buer, ikkje berre rundt Fagerlund Hotell, men også i Jernbanevegen, slik som under Rakfiskfestivalen.
- Vi har søkt Statens vegvesen om løyve til å stenge av Jernbanegata og håpar å få ja til det, seier Leithe Husager.
Arrangørane har henta inn to matekspertar til å fronte arrangementet. Den eine er kjendisbudeie Berit Nordfjord, mellom anna kjend frå 9-timen. Den andre er Eivind Hålien, superkokk frå Høresbygda. Han er direktør i Fagforum for mat og drikke, og dessutan styremedlem i Fagerlund Hotell og hotellet sin mentor på mat.
Dei skal saman laga små gourmetrettar ute i gata som folk kan få kjøpe og smaka på.
- Det skal lukte mat over heile byen under Valdresgildet 2009, seier Leithe-Husager.
Eit par bakstedeier skal også delta. Dei vil baka lefse og lappar for sal og prøvesmaking.
På kvelden blir det «Gildemiddag» på Fagerlund Hotell, med gjestekokk-basert mat.
- Då skal vi laga fest for alle og vise rikdomen i den lokale maten, seier Leithe Husager.
Nytt i år er at også andre matprodusentar blir inviterte til å vise fram og selja sine produkt i buer rundt om.
– Her vil ein kunna kjøpe alt frå valdressjokolade og valdresøl til kurv og lefse, seier Leithe Husager.

Vekstpotensial
Nytt er det også at utlendingar i Valdres er inviterte til å laga sine spesialrettar på basis av valdresråvarer.
I det heile er alle matrelaterte innslag velkomne til å bestille buplass hos Geir Harald Fodnes.
Oppslutninga om Valdresgildet har vore varierande.
I år håpar arrangørane på auka oppslutning.
- Valdresgildet har eit stort vekstpotensial, og alle er hjarteleg velkomne, seier Fodnes og Leithe Husager.