Dei 200 frammøtte var med på å lage ei flott ramme om festkvelden for prisvinnarane.
Hedalen musikkorps innleidde, under stø leiing av kulturprisvinnar Arild Bjørnstad. Hedalen sangkor og korpsbandet hadde fine innslag, ikkje minst imponerte unge Anne Mattea Digene med ei fyldig og stø stemme med vidt spenn. Fire unge korpaspirantar imponerte også med godt samspel.

Glad i barn og unge
Det var ståande applaus då ordførar Kåre Helland delte ut kulturprisen til Arild Bjørnstad, og takka han for framifrå innsats for musikklivet i kommunen gjennom fleire tiår. Vinnaren sjølv fortalde om ein rik barndom og ungdom fylt med sang og musikk.

– Det å hjelpe andre til å få same mulegheiter som eg fekk har vore ei stor glede. Og aller mest glad er eg i å jobbe med barn og unge, sa Bjørnstad, som takka mange, ikkje minst kona Marianne, som har hatt mange åleinekveldar.

Idrettsprisen
Ti spreke fotballjenter vart kalla fram for å motta idrettsprisen for kommunen. Tredjeplassen i Norway Cup er beste valdresresultat nokon gong, det viste sambygdingane å setje pris på. Ordføraren sa då også at han var skikkeleg stolt over å ha så flotte ungdomar i kommunen.

Trenar Jan-Arild Hegdal trekte i takketalen sin fram det gamle, gode ordtaket «øving gjer meister». Han peikte elles på det gode samhaldet og samarbeidet, både på og utanfor banen.

Mange helsingar
Etter matpausen var det fine innslag frå musikkorpsa Bagn og Begnadalen, leia av Ole Fønhus. Seinare var det to sketsjar som fekk lattersalvene til å runge, det var spesiallaga songar til prisvinnarane, og musikk ved gruppa Young Rockers.
Bjørnstad fekk mange helsingar, både musikalsk (ved Ole Kristian Nyhagen på flygelhorn), konfekt, blomar og rakfisk! Og avsluttande song frå Hedalen musikkorps og Arnstein Kjensrud.

Inspirasjon
Største overraskinga, også for hovudpersonen, kom nesten til slutt. Ordførar Helland kunne invitere Elling Fekjær fram for å få H.M. Kongens fortenestmedalje i sølv.

– Eg har vore heldig som har fått jobbe heile livet mitt med å hjelpe dei som kanskje har det tyngst i livet, som slit med psykiske problem. Det er eg takksam for, og denne utmerkinga inspirerer til vidare innsats, sa ein rørt Elling Fekjær, som ikkje minst takka det trufaste og engasjerte personalet på Fekjær.