I sitt budsjettforslag for 2010 legg rådmannen ikkje inn pengar til taksering av eigedommar.

– Har ikkje pengar

– Vi har ikkje pengar i kommunen til å gjennomføre ei slik taksering i 2010. Men vi legg inn 2,2 millionar i disposisjonsfondet, med sikte på at vi dermed skal ha økonomi til å gjennomføre takseringa i løpet av 2011, seier rådmann Erland Odden. Ein reknar med at heile takseringsjobben i Sør-Aurdal vil koma på rundt 5,5 millionar kroner.
Sør-Aurdal kommune har vore nede i ei økonomisk hengemyr, og det må gjerast skikkelege grep for å få kommunen på fote økonomisk.
Kommunen reknar med at eigedomsskatt over heile kommunen vil gi Sør-Aurdal ei årleg ekstrainntekt på mellom 3,2 og 19,4 millionar kroner. Ikkje minst vil det bli store inntekter frå dei rundt 3.400 hyttene i kommunen.

– Nedskjering

Erland Odden opplyser at 2010-budsjettet blir strammare enn nokon gong.

– Vi legg opp til å klare eit netto driftsresultat på seks millionar kroner. Det må vi klare dersom vi skal få betalt ned på underskotet vi pådrog oss i 2008. Dette betyr ei nedskjering på 5,5 millionar kroner i 2010. Skulle vi teke heile underskotet i ein jafs, måtte vi ha skore ned ytterlegare åtte millionar kroner neste år, seier Odden.
Kommunen har for tida ei lånegjeld på 135 millionar kroner, noko som tilsvarar rundt 44.000 kroner per innbyggar.

I 2010 blir det lagt opp til sparsame investeringar.
6,75 millionar kroner er sett av til renovering på Sør-Aurdal ungdomsskule. To millionar kroner skal gå til utbygging på Bagn skule, som konsekvens av elevoverføringar. Omgjering på Tingvolltoppen er rekna til 1,6 mlllionar kroner, og det er dessutan lagt inn 0,6 millionar for å oppfylle IKT-planen.
Budsjett og økonomiplan skal behandlast i kommunestyret torsdag 17. desember.