I samarbeid med blant andre Den Norske Turistforening og Fairtrade etablerer rockefestivalen på Eidsbugarden sitt eige fond. Vinjerockfondet skal gje støtte til rørslehemma ungdom mellom 15 og 30 år som vil ut på tur i norsk natur.

Tilrettelegging for rørslehemma har vore eit satsingsområde for festivalen i Jotunheimen heilt frå fyrste stund, og det har til tider vore trongt om plassane både på festivalens «handicamp» og på rullestolrampa framfor scena. Denne gode responsen gav festivalleiinga ideen til å satse enno meir på dette arbeidet.
    – Med dagens hjelpemiddel er det meste mogleg, men dessverre er det ofte slik at alle dei ekstra kostnadane for alt rundt set ein stoppar, fortel festivalsjef Eirik Høyme Rogn.

Samarbeidsprosjekt
Med dette i bakhovudet tok leiinga i Vinjerock initiativet til å etablere eit turfond i samarbeid med sine støttespelarar i Den Norske Turistforening. Dei tente på ideen umiddelbart, og då byrja ballen å rulle.
    Fondet skal mellom anna gje støtte til utgifter med ledsager og transport til og frå – eller for etapper under – turane. Det vil bli to søknadsfristar i året, og ein jury med representantar frå samarbeidspartane og eksterne kvalifiserte personar vil stå for tildelingane. Fondet vil vera ope for søkjarar frå heile landet, det einaste kravet er at dei er innafor aldersavgrensinga og har fast bustadsadresse i Noreg.
    Ein annan samarbeidspartnar av Vinjerock, Vang Sparebank, har teke på seg å forvalte fondet vederlagsfritt, slik at alle inntektene kan gå uavkorta til å realisere turdraumar.
    – Den velvilja set vi utruleg stor pris på, for det er veldig viktig for oss å ikkje samle inn pengar som til sjuande og sist blir ete opp av byråkrati og papirarbeid, slår Høyme Rogn fast.

Kaffi, pant og kunst
Ved sidan av å oppmode alle sine samarbeidspartnarar om å bidra med eit beløp har festivalarrangørane fleire prosjekt på årets festival for å skaffe inntekter til fondet. Eit av dei største er eit samarbeidsprosjekt med Fairtrade Max Havelaar Norge, som driftar «Aasmunds Kaffebar» på festivalen. Alt overskotet derifrå vil gå uavkorta til fondet.
    I tillegg vil festivalen gje ei krone til fondet for kvart ølglas som blir panta på festivalområdet, noko som gjev dobbelt effekt for Vinjerock når miljøet blir skåna i tillegg.
    Det siste prosjektet under årets festival er kanskje det mest spesielle. Festivalsjefen kan nemleg røpe at alle artistane på festivalen blir invitert til å måle eit bilete backstage, som blir auksjonert bort til inntekt for Vinjerockfondet etter festivalen.
    – Vi har allereie fått fleire meldingar frå artistar som gler seg stort til å svinge penselen, sjølv om fleire av dei var kjapt ute og slo fast at dei ikkje kunne garantere for den kunstnariske kvaliteten, ler Høyme Rogn.