— Vi legg sjølvsagt ikkje ned anlegg berre for å leggje dei ned. Det handlar om at vi heile tida må tilpasse oss marknaden på ein best mogleg måte. Vi må møte morgondagens konkurranse, drive økonomisk og stille oss i ein posisjon som gjer at forbrukarane framleis skal føretrekkje våre varer framfor andres, seier visekonsernsjef Stein Øiom i Tine SA til Nationen.

Tine har 44 meieri att spreidd over heile landet, men stadig aukande konkurranse og behov for meir rasjonell drift gjer at nye nedleggingar står for tur, melder avisa.

Visekonsernsjefen i Tine gjer det klart at det er naturleg å sjå på konsummjølk-situasjonen på Austlandet og kvitostproduksjonen landet over, etter at dei nye anlegga i Oslo og på Jæren er tatt i bruk. Dermed er meieria i Sarpsborg, Odal og Fosheim i Valdres i fare.

— Ingenting er bestemt og det er langt fram, men ein kan jo seie at situasjonen er usikker for eit knippe med meieri. Vi kan ikkje gje eksakte tal på kor mange meieri vi vil ha om fem års tid, men eg vil tru det fort kan nærme seg 30-talet, seier Øiom.