Ingjerd Thon Hagaseth og Ole Knut Steinset i Etnedal har laga den rykande ferske boka, som også har mange fargefoto frå Valdres.

Dialekt, kultur og mat
Spørjeboka er delt inn i 20 ulike kapittel eller tema. Det opnar med 45 varierte spørsmål om Valdres, så kjem blanda spørsmål frå kvar kommune. Andre kapittel tek for seg valdresdialekten, historie, kultur, geografi, mat, sport og mykje anna.

Også eit kapittel med spørsmål for dei yngste vart det plass til. I alt 714 spørsmål som høver både i lystige lag og uformelle konkurransar. Og bak i boka finn du svar på alle spørsmåla.

Idé frå Røros
Ideen til boka dukka opp då ekteparet for eit par år sidan kom over ei lokal spørjebok på Røros.

– Sjølv om denne boka var veldig enkel, og utan bilete, oppdaga vi snøgt at spørsmål var ein god måte å bli betre kjend i området på, fortel Steinset.

Han legg til at dei har sjølve laga disposisjonen for innhaldet i kvissboka, her var det lite å hente i Røros-boka. Også bileta står dei sjølve for, praktisk tala alle motiva er fanga i Valdres.

Folkeopplysing
Begge forfattarane kjenner Valdres godt, både frå arbeid og fritid. Steinset gjennom jobben som fjelloppsyn, naturkonsulent og rovviltkontakt, Thon Hagaseth gjennom mange år både i skuleverket og ikkje minst knytt til turistinformasjon og reiseliv. Begge har eit brennande ynskje om å gjera Valdres meir kjent, og samstundes å drive litt generell folkeopplysing.

– Kviss er veldig populært for tida, og kanskje kan boka vår bidra til at enkelte oppdagar nye og spanande sider ved Valdres, seier Thon Hagaseth.

Ho fortel at dei gjerne tek imot respons, også på vanskegraden i spørsmåla i boka.

– Vi fekk gode tilbakemeldingar under Rakfiskfestivalen. Skulle det fortsetje slik er vi ikkje framande for tanken om å lage ei bok til, seier Ole Knut Steinset.