– Fyrst trudde vi det stod ein null for mykje, men då begge sønene mine hadde fått 13.000 kroner inn på kontoen, så stod jubelen i i taket. Dette er ikkje mindre enn fantastisk, og ære vera oss for at vi bur i Vang, seier ein oppglødd pappa, Ola K. Strand.

Aksjegevinst

– Tenk kor mykje pengar dette er for ein student, seier Strand, som synes dette er ei heidundrande gladsak, noko vi må seie oss einige i.

– Tidlegare år har studentane fått utbetalt mellom 3000 og 4000 kroner. I fjor var det 3.700 kroner, så vidt eg minnest, seier legatstyrar Inger Sørum. 

– Kva er årsaka til at beløpet nesten er firedobla?

– Noko av legatpengane forrentar seg i bank, medan resten er investert i aksjar. I år har dette gjeve eit vidunderleg overskot, seier Sørum, som i likhet Arnlaug Gjevre Haugen på kommunekassa i Vang ikkje vil røpe kven som har spekulert i dei gode aksjebeløpa. 

67 av 70 fekk

Alle studentar frå Vang, som tek utdanning ut over grunnskule, kan søkje legatet, og i år kom det inn 70 søknader til legatstyret, ved formann Inger Sørum. 67 av dei innfridde statuttane og fekk utbetalt tidenes førjulsgåve i Vang.

– Alle studentane fekk likt. Dei fekk 13.000 kvar, seier formannen for legatet, Inger Sørum.

I statuttane står det at den som søkjer må ha heimeadresse i Vang og vera i alderen 16 til 30 år. 

– Statuttane vart skrive ned i 1938, og det årlege utbyte av legatet går til vangsungdom som vil utdanne seg jord- eller skogbrukar, handverkarar eller ved ein annan skuleutdanning, for eksempel som lærer, teknikar eller ved universitet, seier Sørum. 

871.000 kroner

– Vi har drøfta dette nokre gonger i legatstyret, korleis ein skal tolke denne ordlyden i våre dagar. Det er rundt formulert, med for eksempel og liknande. Det er grunnen til at vi gjev stipend til alle søkjarar som utdannar seg ut over grunnskule, seier Sørum, og legg til at søknadsmassen har auka frå år til år, noko som kanskje ikkje er så rart, med ei slik utteljing.

– Og i år trur eg det er rekordstort. Det blir vel ganske bra neste år og, for dette er desidert høgaste utbetaling for legatet, avsluttar Sørum, som med god hjelp frå Arnlaug Gjevre Haugen på kommunekassa har anvist den nette sum av 871.000 kroner til ungdomen i Vang før jul.