– Når telesambandet ryk, merker vi kor avhengige vi er av det, seier Harald Lasskogen, innehavar av butikken Joker Vaset.

På Vaset vart både fasttelefonen, internett og mobilnettet til Telenor slått ut av uvêret. Sambandet til Netcom har vore intakt.

– Det var på hengande håret at ikkje også kjøle- og fryselageret gjekk fløyten. Straumen gjekk natt til måndag. At feilen vart retta slik at vi fekk att straum ein times tid på natta, berga nok kjøle- og frysevarene. For då vart dei nok nedkjølte att til at temperaturen heldt seg gjennom den neste straumlause perioden. Før 07.30 måndag morgon var straumen på plass att, seier Lasskogen.

Jula er ein viktig sesong for butikken hans.
– 90 prosent av handelen er basert på kort. Utan telesamband kan vi ty til ei reserveløysing, men den er veldig treg. Den aksepterer berre norske bankkort; ikkje kredittkort og utanlandske bankkort. Det er mellom anna ein del tyske gjester på Vaset for tida. Kundane som pleier å sende bestilling på e-post, får ikkje gjort det no. Det er frustrerande at ikkje teleoperatørane har ei backup-ordning. No har det gått snart tre døgn, og sambandet er enno ikkje tilbake, sukkar kjøpmann Harald Lasskogen.

Montørane han var i kontakt med onsdag, håpa at feila ville bli retta i løpet av dagen. Det skjedde ikkje.

– Vi fekk tidleg kartlagt at tre av basestasjonane våre i Vestre Slidre vart slått ut. Men det viste seg at feila ligg ikkje berre der. Stormen har også gjort skade i utstyret på Ålfjell, opplyser informasjonssjef Kristin Tønnessen i Telenor.

– Kvifor går det så lang tid før det blir reparert?

– Alt mannskap som er tilgjengeleg midt i ei ferietid, arbeider på spreng. Svært mange feil oppstod i stormen, og det må nødvendigvis ta noko tid før mannskapet rekk over å få i orden alt. I oversikta eg har frå klokka 10.30 onsdag, ser eg at også fastlinja til ca. 200 abonnentar på Fagernes var ute. Når det gjeld Ålfjell, er det berre i dagslys arbeid kan pågå i masta der. Torsdag morgon går mannskapet opp i masta igjen, og vi håper at alt skal vera ordna innan klokka 16 torsdag, seier Tønnessen.