I den trivelege restauranten og utestaden Tasty House på Fagernes vert dei tilsette trakassert på jobb i helgene, dei må tole slengkommentarar og nedlatande åtferd frå enkelte gjester – fordi dei ikkje er norske. Og fordi enkelte valdrisar likar å «tøffe seg» på dette viset. Kvifor lar vi andre dette skje?

Les også

Tafsing, hånlig latter, onde blikk, baksnakking og slengkommentarer er en del av jobbhverdagen til Thea (25) og kollegene – nå orker ikke personalet mer

Sjølvmordsstatistikken for Valdres er dyster lesing. Kva kan grunnen vera til at så mange gutar og menn vel å ta sitt eige liv her i Valdres? Har du tenkt over det?

Eit ektepar på Leira mottek krenkande og hatefulle brev i postkassa si fordi dei er av same kjønn. Saka går Norge rundt i media. Folk flest reagerer med vantru. Fleire andre i Valdres melder om å ha vore utsett for hatbrev, men våger ikkje å stå fram. Saka er no henlagt av Politiet. Ein må gå ut frå at «nokon» veit noko om dette – men dei står ikkje fram. Kvifor ikkje det?

Les også

Hatbrev-saken henlagt

Ungdom «som ikkje passar inn» flytter frå Valdres og kjem aldri att. Kunne eit meir tolerant og inkluderande samfunn fått dei til å bli?

Innvandrarar i Valdres blir sett ned på fordi dei «ikkje er som oss». Kvifor tek vi ikkje imot nye innbyggarar i Valdres med opne armar og iver etter å gi dei ein plass i samfunnet?

Faktum er at det samla folketalet i Valdres går ned for kvart einaste år. Det er stor mangel på arbeidskraft, spesielt i reiselivsnæringa, men og i andre servicenæringar. Dermed treng vi å tilsette folk utanfrå, i mange høve frå andre land. Globaliseringa er komen til Valdres også.

Vi har alle saman eit ansvar for å stå opp mot dyrking av fordomar, til å avvise generaliseringar og til å seie ifrå til dei som er ufine, om det er i lukka private rom eller i det offentlege rom.

Skal Valdres vera ein attraktiv stad å bu i framtida må vi endre inngrodde haldningar. Vi må vise toleranse og vi må gi folk rom til å vera seg sjølv. Og fyrst og fremst må vi vise vanleg folkeskikk – til alle.

Blir du med på det? Er du tøff nok?